हाँगकाँग येथील आशियाई ट्रॅम्पोलिंग स्पर्धेत कणकवली तालुक्यातील १२ वर्षीय मंथन पराग उकर्डे याची उल्लेखनीय कामगिरी
कणकवली : हाँगकाँग येथे पार पडलेल्या आशियाई ट्रॅम्पोलिंग स्पर्धेत कणकवली तालुक्यातील १२ वर्षीय मंथन पराग उकर्डे याने उल्लेखनीय कामगिरी करत सहावे स्थान पटकावले. या यशामुळे सिंधुदुर्ग जिल्ह्याच्या शिरपेचात मानाचा तुरा रोवला गेला असून भारतासाठीही ही अत्यंत अभिमानाची बाब आहे.
या स्पर्धेसाठी प्रत्येक गटातून भारताचे प्रतिनिधित्व करण्याकरिता केवळ दोन खेळाडूंची निवड करण्यात आली होती. १२ वर्षांखालील गटात कणकवलीचा सुपुत्र मंथन उकर्डे याची निवड होणे आणि त्यानंतर आशियाई स्तरावर उत्कृष्ट कामगिरी करणे ही निश्चितच कौतुकास्पद बाब आहे.
स्पर्धेनंतर भारतात परतल्यानंतर मंथन व त्याच्या कुटुंबीयांनी आज कणकवली येथे पालकमंत्री नितेश राणे यांच्या निवासस्थानी सदिच्छा भेट घेतली. यावेळी मंथनचे मनःपूर्वक अभिनंदन करून त्याला पुढील वाटचालीस शुभेच्छा दिल्या. आगामी वर्ल्ड चॅम्पियनशिपमध्येही मंथनने दमदार कामगिरी करावी यासाठी त्याला प्रोत्साहन देत आवश्यक ती सर्वतोपरी मदत करण्याचा विश्वास उकर्डे कुटुंबीयांना दिला.
मंथनच्या या यशामुळे सिंधुदुर्गातील युवा खेळाडूंना नवी प्रेरणा मिळेल, असा विश्वास आहे. त्याच्या उज्ज्वल भविष्यासाठी हार्दिक शुभेच्छा!
