मनसे मालवण माजी शहर अध्यक्ष विशाल ओटवणेकर यांचा इशारा
मालवण : मालवण शहरात भटक्या कुत्र्यांचा वावर वाढला असून कुत्र्यांनी चावा घेतल्याचा घटना देखील वाढल्या आहेत.भटक्या कुत्र्यांबद्दल मालवण नगरपरिषदेचे लक्ष वेधूनही याकडे दुर्लक्ष केले जात आहे, तरी येत्या १०-१५ दिवसात कुत्र्यांचा बंदोबस्त न केल्यास तीव्र आंदोलन छेडण्याचा इशारा मालवण मनसे च्या वतीने देण्यात आला आहे.
मालवण शहरातील भटक्या कुत्र्यांबाबत मालवण नगरपरिषदचे दुर्लक्ष होत आहे.काही दिवसापूर्वीच मालवण मधील लहान मुलावर व त्याच्या आईवर भटक्या कुत्र्यांनी हल्ला केला. या हल्ल्यात मुलाच्या पायाला चावा घेऊन गंभीर दुखापत झाली आहे. हा अतिशय भीतीदायक विषय आहे. या आधीही प्रसारमाध्यमातून भटक्या कुत्र्यांचा विषय मनसे तर्फे मालवण नगरपरिषदेच्या निदर्शनास आणण्यात आला होता, परंतु त्यावर दुर्लक्ष करून कोणतीही समाधानकारक कारवाही करण्यात आली नाही.असे मनसे मालवण शहर अध्यक्ष विशाल ओटवणेकर यांनी म्हटले आहे.
तसेच गाडीसमोर कुत्रे आल्याने अपघात होण्याच्या घटना देखील वारंवार घडत आहे. तरीही प्रशासन यावर पूर्ण दुर्लक्ष करत आहे. भटक्या कुत्र्यांचा वाढत्या संख्येमुळे नागरिकांमध्ये भीतीचे वातावरण निर्माण झाले आहे.
त्यामुळेच मालवण नगरपरिषदेने येत्या 10 ते 15 दिवसात भटक्या कुत्र्यांचा योग्य तो बंदोबस्त लावावा, अन्यथा मनसे तर्फे मालवण नगरपरिषदेच्या बाहेर तीव्र आंदोलन करण्यात येईल, असा इशारा मालवण माजी शहर अध्यक्ष विशाल ओटवणेकर यांनी दिला आहे.
