सौ. अन्वेषा अजित आचरेकर

• पर्यटन उद्योजिका मालवण

💐 नवदुर्गा पुष्प : चौथे 💐

नवदुर्गा : सौ. अन्वेषा अजित आचरेकर

एका सर्वसामान्य कुटुंबातील मुलगी ते एक पर्यटन उद्योजिका हा प्रवास मेहनत व कष्टाच्या वाटेवर राहिला. मात्र मोठ्या जिद्दीने अन्वेशा यांनी पर्यटन क्षेत्रात आपले स्थान निर्माण केले आहे.

अन्वेशा या पूर्वाश्रमीच्या चारुशीला सोनवडेकर. त्यांचा जन्म देऊळवाडा येथील सर्वसामान्य कुटुंबात झाला. शिक्षण मालवण येथेचे झाले. २०११ या वर्षी त्यांचा विवाह मालवण दांडी अजित आचरेकर यांच्याशी झाला. अजित यांचा मासेमारी हा मूळ व्यवसाय. सोबत कार टुरिस्ट व्यवसायातही अजित हे कार्यरत होते. पती अजित यांना अन्वेशा (चारुशीला) यांची खंबीर साथ लाभली. दरम्यानच्या काळात अजित हे पर्यटन व्यवसायात उतरले. अन्वेशा या पतीसोबत व्यवसायाची सतत माहिती घेत राहिल्या. या व्यवसायात काही नवीन करता येईल का ? पर्यटकांना सुरक्षित आणि सर्वोत्तम पर्यटन सेवा देण्यासाठी नाविन्यपूर्ण काहीतरी असावे या भावनेतून सतत माहिती घेणे. अन्य पर्यटन स्थळे, अन्य पर्यटन शहरे येथील सेवा सुविधा या सर्वांची माहिती घेत पती अजित यांच्या साथीने अन्वेशा यांनी पर्यटन क्षेत्रात दमदार पाऊल टाकले.

सोबत २० ते २५ सहकारी यांच्या माध्यमातून अजित, अन्वेशा यांनी पर्यटन क्षेत्रात एक दर्जात्मक ओळख निर्माण केली आहे. एक सर्वसामान्य कुटुंबातील मुलगी ते एक उद्योजिका हा अन्वेशा यांचा प्रवास आदर्शवत असाच आहे.

अन्वेशा सांगतात आज मी जी काही आहे त्याचे सर्व श्रेय पती अजित यांचे व सर्व कुटुंबियांचे आहे. त्यांची खंबीर साथ व दिलेला विश्वास याच बळावर मी उभी आहे. पर्यटन क्षेत्रातील आमची ही सुरवात आहे. या पुढे बरेच काही नाविन्यपूर्ण करायचे आहे. पर्यटकांना दर्जेदार सेवा, सुरक्षित पर्यटन या माध्यमातून सर्वोत्तम पर्यटन सेवा देताना मालवणचा ब्रँड अधिकपणे सर्वत्र पोहचवायचा आहे. असे त्या सांगतात.

पर्यटन क्षेत्रा सोबत राजकीय क्षेत्रातही कार्यरत राहून भाजपा महिला आघाडी मालवण शहर अध्यक्षा म्ह्णून त्या ठिकाणीही आपल्या नेतृत्वाचा यशस्वी ठसा त्यांनी उमटवला. सामाजिक क्षेत्रातही त्यांचे योगदान नेहमीच राहिले आहे. महिलांचे सक्षम नेतृत्व म्हणून त्या केंद्रस्थानी असतात. अष्टपैलू व्यक्तीमत्व अन्वेशा सामाजिक, राजकीय व पर्यटन क्षेत्रातही निश्चितच उतुंग भरारी घेतील. यात शंका नाही.स्काय न्यूज टुडे परिवाराच्या वतीने सौ. अन्वेशा अजित आचरेकर यांना पुढील वाटचालीस मनःपूर्वक शुभेच्छा.