महाराष्ट्र शासनाच्या मुख्यमंत्री माझी लाडकी बहीण योजनेची प्राप्त रक्कम समायोजित करू नये | दिले निवेदन
मालवण : महाराष्ट्र शासनाच्या मुख्यमंत्री माझी लाडकी बहीण योजनेची प्राप्त रक्कम ही वेगवेगळ्या कारणांसाठी लाभार्थी महिलांच्या बँक खात्यामधून परस्पर वजा करून बँका आपली थकीत देयके महाराष्ट्र शासनाच्या मुख्यमंत्री माझी लाडकी बहीण योजनेच्या प्राप्त रक्कमेतून समायोजीत करत आहेत. अश्या प्रकारच्या तक्रारी काही महिलांच्या माध्यमातून प्राप्त झाल्या आहेत. या बाबत शिवसेना महिला आघाडी मालवण तालुका प्रमुख मधुरा रमेश तुळसकर यांनी युनियन बँक आणि बँक ऑफ बडोदा शाखा मालवण येथे जाऊन बँक मॅनेजर यांच्याशी याविषयावर चर्चा केली. तसेच या योजनेचा जीआर दाखऊन लाभार्थी महिलांचे पैसे रीफंड करावयाची विनंती केली. ब्रांच मॅनेजर यांनी याबाबत झालेल्या प्रोसिजर तसेच वरीष्ठांशी बोलून दोन ते तीन दिवसात पुढील कार्यवाही करू असे सांगितले.
मुख्यमंत्री एकनाथ शिंदे यांच्या नेतृत्वाखालील महाराष्ट्र शासन निर्णय १९/०८/२०२४ नुसार महाराष्ट्र शासन सचिव डॉ. अनुप कुमार यादव यांच्या पत्र क्र. मबावि-२०२४/प्र.क्र. ९६ (भाग-२)/का-२. नुसार मुख्यमंत्री माझी लाडकी बहीण योजनेची प्राप्त रक्कम ही कोणत्याही कारणासाठी समायोजीत करण्यात येऊ नये. मात्र असे असताना मुख्यमंत्री माझी लाडकी बहीण योजनेची प्राप्त रक्कम ही वेगवेगळ्या कारणांसाठी समायोजित करत आहेत. यामुळे शासनाकडून लाभ मिळून ही बऱ्याच महिला लाभार्थी या लाभापासून वंचित राहिल्या असून बँकांच्या या धोरणामुळे महाराष्ट्र शासनाच्या मुख्यमंत्री माझी लाडकी बहीण योजनेच्या मुळ उद्देशाला बाधा येत आहे. तरी आपण यात लक्ष घालून दि. १९/०८/२०२४ च्या महाराष्ट्र शासन सचिव डॉ. अनुप कुमार यादव यांच्या पत्र क्र. मबावि-२०२४/प्र.क्र.९६ (भाग-२)/का-२. या पत्राचा विचार करुन योग्य ती कारवाई करावी ही विनंती. असे बँक मॅनेजर यांना दिलेल्या निवेदनात म्हटले आहे.
यावेळी शिवसेना महिला आघाडी उपतालुकाप्रमुख प्रियांका कुमावत, उपशहरप्रमुख योगिता साळुंखे, तसेच बेसिक शिवसेना उपतालुका प्रमुख अरुण तोडणकर, सौ. तोडणकर हे उपस्थित होते.
