गटविकास अधिकारी यांच्या लेखी आश्वासना नंतर असगणी येथील संतोष राऊत यांचे उपोषण स्थगित

असगणी कुस्थळवाडी येथील मगांराग्रारोहयो अंतर्गत रस्ता काम प्रश्नी पंचायत समिती समोर उपोषण

अपूर्ण काम ग्रामपंचायत पुर्ण करणार असल्याचे प्रशासनाने दिले पत्र

मालवण | प्रतिनिधी : मगांराग्रारोहयो - महाराष्ट्र अंतर्गत असगणी कुस्थळवाडी ते तारभाटवाडी मुख्य रस्त्यास जोडणाऱ्या अपूर्ण रस्ता कामाची चौकशी करण्याबाबतची लेखी तक्रार संतोष राऊत यांनी मालवण गटविकास अधिकारी आत्मज मोरे यांच्याकडे निवेदन माध्यमातून दिली होती, मात्र अपेक्षित न्याय न मिळाल्याने 23 सप्टेंबर रोजी मालवण पंचायत समिती समोर असगणी येथील संतोष राऊत यांनी पत्नी सोबत उपोषण छेडले. दरम्यान, गटविकास अधिकारी यांनी आत्मज मोरे यांनी उपोषणकर्ते तसेच सरपंच, उपसरपंच, ग्रामसेवक, ग्रामरोजगार सेवक, ग्रामस्थ यांच्याशी चर्चा केली. त्यानुसार ग्रामपंचायत यांनी अपूर्ण रस्ता काम पुर्ण करून देणार असल्याचे सांगितले. याबाबत लेखी पत्र गटविकास अधिकारी यांनी दिल्या नंतर उपोषणकर्ते यांनी भाजपा तालुकाध्यक्ष धोंडी चिंदरकर यांच्या हस्ते पाणी पिऊन उपोषण स्थगित केले. यावेळी भाजपा तालुका सरचिटणीस महेश मांजरेकर, मालवण शहर प्रभारी संतोष गावाकर व अन्य ग्रामस्थ उपस्थित होते.