मालवण न्यायालयात हजर केले जाणार …
मालवण : राजकोट किल्ला येथील छत्रपती शिवाजी महाराज यांचा पुतळा दुर्घटनेतील गुन्हा दाखल असलेला मुख्य आरोपी शिल्पकार जयदीप आपटेला रात्री कल्याण पोलिसांनी त्याच्या राहत्या घरातून ताब्यात घेतले आहे. रात्री त्याला सिंधुदुर्ग पोलिसांच्या ताब्यात देण्यात आले. त्याला मालवण पोलीस ठाण्यात आणले असून अटक करण्यात आली आहे. दुपारी न्यायालयात हजर केले जाणार आहे. अशी माहिती मालवण पोलीस निरीक्षक प्रवीण कोल्हे यांनी दिली.
जयदीप आपटेच्या शोधासाठी महाराष्ट्र पोलिसांनी सातहून अधिक पथके तैनात केली होती. ही पथके त्याचा शोध घेत होती. २६ ऑगस्ट रोजी पुतळा कोसळल्या नंतर गुन्हा दाखल झाल्यानंतर पोलीस जयदीप आपटेचा शोध घेत होते.
कल्याण पोलिसांनी जयदीप आपटे याला ताब्यात घेत सिंधुदुर्ग पोलिसांच्या ताब्यात दिले. त्याला आज सकाळी मालवण पोलीस ठाणे येथे आणण्यात आले आहे. यात गुन्ह्यातील तांत्रिक सल्लागार डॉ. चेतन पाटील यांच्या पोलीस कोठडीची मुदत ही आज संपत असल्याने त्याच्यासोबत जयदीप आपटे यालाही दुपारी न्यायालयात हजर केले जाणार असल्याची माहिती मिळाली आहे.
