एनडीआरएफ पथकासह प्रशासनाच्या तत्परतेचे होतंय कौतुक
कुडाळ : सिंधुदुर्ग जिल्ह्यात कालपासून मुसळधार पाऊस कोसळत आहे. जिल्हाधिकारी किशोर तावडे यांच्या मार्गदर्शनाखाली जिल्हा प्रशासन सतर्कतेने परिस्थिती हाताळत आहे. जिल्ह्यात कोणतीही हानी होऊ नये यासाठी यंत्रणा सतर्क आहे. दरम्यान सकाळी पोलीस पाटलांनी कुडाळ रेल्वे स्टेशन शेजारील सिद्धिविनायक हॉल परिसरात काही जनावरे पाण्यात अडकल्याचे कुडाळ उपविभागीय अधिकारी ऐश्वर्या काळुसे यांना दूरध्वनीद्वारे माहिती दिली.
परिस्थितीचे गांभीर्य लक्षात घेत उपविभागीय अधिकारी श्रीमती ऐश्वर्या काळुसे, तहसीलदार विरसिंग वसावे, पोलीस निरीक्षक राजेंद्र मगदूम, नायब तहसीलदार प्रतीक आढाव, एनडीआरएफचे पथक प्रमुख प्रमोद राय सतर्क झाले आणि एनडीआरएफचे पथक संबंधित ठिकाणी तात्काळ पोहोचले. एक रेडा दोरीने बांधलेला होता त्या परिसरात पाणी वाढले. परिस्थितीचे गांभीर्य ओळखून या रेड्याला सुखरूप बाहेर काढण्यासाठी पथकाने पुराच्या पाण्यामध्ये बोटीने जाऊन रेड्याला बांधलेली दोरी तोडली आणि त्या रेड्याला सुखरूप बाहेर काढले. त्याठिकाणी म्हैस व अन्य जनावरे यांना सुरक्षित ठिकाणी नेण्यात आले.
तसेच कुडाळ येथील गुलमोहर हॉटेल परिसरात पुराच्या पाण्यात २ शेळ्या अडकलेल्या आहेत. त्यांची देखील सुटका NDRF पथकाने केली आहे.
नेहमी नागरिकांच्या मदतीला देवाप्रमाणे धावणाऱ्या एनडीआरएफच्या पथकाने आज मुक्या जनावराला देखील जिवदान दिल्याने त्यांचे सर्वत्र कौतुक होत आहे.
प्राण्यांना जन्मताच पाण्यात पोहता येते परंतु बांधून असलेल्या प्राण्याला अश्या आपत्ती स्थितीत कोणत्याही प्रकारची हालचाल करता येत नाही आणि ते संकटात सापडतात. तरी योग्य ती खबरदारी सर्वांनी घ्यावी असे आवाहन जिल्हाधिकारी किशोर तावडे यांनी केले आहे.
