समुद्री जीव संपत्तीला 'घोस्ट नेट'चा मोठा धोका…
वेंगुर्ला निवती लाईट हाऊस जवळ श्रीकृष्ण बोटिंग ग्रुप, देवबाग चे बोट मास्टर किशोर राऊळ यांनी केली सुटका.
मालवण |प्रतिनिधी : वेंगुर्ला निवती लाईट हाऊस जवळ पर्यटक समुद्र सफारीला गेले असता पाण्याच्या पृष्ठभागावर एक समुद्री कासव हे घोस्ट नेट मध्ये अडकलेल्या अवस्थेत श्रीकृष्ण बोटिंग ग्रुप, देवबाग चे बोट मास्टर किशोर राऊळ यांच्या निदर्शनास आले. त्यांनी लगेच योग्य ती काळजी घेत त्या ऑलिव्ह रिडले कासवाची घोस्ट नेट मधून सुटका केली. यावेळी बोटमधील पर्यटकांनी त्याची चित्रफीत काढली.
सिंधुदुर्ग जिल्हयामध्ये सर्वात जास्त ऑलिव रिडले या समुद्री कासावची घरटी आढळतात. एकूण अंडी उबवण्याचा यशस्वी दर सिंधुदुर्गमध्ये सर्वाधिक ७७.४७ टक्के नोंदवला गेला आहे. आणि यामुळे सिंधुदुर्ग मधील सागरी जैव विविधता अजून सुस्थितीत असल्याचे अधोरेखीत होते. आणि मासेमारीवर व पर्यटनावर त्याचा सकारात्मक परीणाम होतो.
घोस्ट नेट म्हणजे समुद्रात खडकाळ भागात अडकल्यामुळे सोडून दिलेली किंवा फाटलेली मासेमारीची जाळी जी समुद्री जीवांसाठी मृत्यचा सापळा बनवतात. यामध्ये मासे, समुद्री कासव आणि सस्तन प्राणी अंदाधुंदपणे अडकून मारले जातात. टिकाऊ प्लॅस्टिक पासून बनलेली अशी जाळी समुद्र तळाला अनेक वर्षे टिकून राहतात, प्रवाळ खडकांचे नुकसान करतात आणि नौकानयन मासेमारी साठी व पर्यटनासाठीही धोके निर्माण करतात. त्यामुळे अशा घोस्ट नेट वर उपाय योजना होणे गरजेचे बनले आहे.
