कट्टा : श्री राम जय राम जय जय राम, अनंत कोटी ब्रम्हांडनायक राजाधिराज योगीराज परब्रह्म श्री राणे महाराज की जय या जयघोषात मालवण तालुक्यातील वराड कुसरवेवाडी येथील राणे महाराज यांच्या मठात रामनवमी व राणे महाराज यांचा पुण्यतिथी उत्सव सोहळा भक्तिमय वातावरणात मोठ्या उत्साहात साजरा करण्यात आला.
यावेळी राणे महाराज सेवा ट्रस्टचे पदाधिकारी, सभासद, बहुसंख्य भाविक भक्तगण मोठ्या संख्येने उपस्थित होते. यानिमित्ताने सलग दोन दिवस राणे महाराज मठात धार्मिक कार्यक्रमांचे आयोजन करण्यात आले होते. मठ परिसर आकर्षक विद्युत रोषणाईने, रंगीबेरंगी फुलांनी सजविण्यात आला होता.
यावेळी रामनवमी निमित्ताने २६ मार्च रोजी मूर्ती अभिषेक, रामजन्माचे कीर्तन, रामजन्म सोहळा, महाआरती, अखंड महाप्रसाद, हरिपाठ, बुवा श्री अजित गोसावी व बुवा श्री ज्ञानदेव मेस्त्री यांचे सुश्राव्य भजन असे कार्यक्रम करण्यात आले.
प. पु. राणे महाराज यांच्या पुण्यतिथी निमित्ताने २७ मार्च रोजी राणे महाराज यांच्या पादुकांवर अभिषेक, रामनाम जप व हरिपाठ, महाआरती, अखंड महाप्रसाद, प. पू. नामदेव महाराज भक्त मंडळी यांचा हरिपाठ व भजनाचा कार्यक्रम, राणे महाराज यांच्या पादुका व प्रतिमेसह पालखी मिरवणूक, श्री देवी माऊली प्रासादिक भजन मंडळ, किनळोस यांचे वारकरी भजन असे कार्यक्रम घेण्यात आले .या सर्व कार्यक्रमामुळे राणे महाराज मठ परिसरात भक्तिमय वातावरणात निर्माण झाले होते.
