ग्रामस्थ आक्रमक
मिली मिश्रा | दोडामार्ग : झरेबांबर तिठा,दोडामार्ग येथे रस्ता ओलांडताना भाजी वाहतूक करणाऱ्या भरधाव टेम्पोने धडक दिल्यामुळे कु. श्रेया संदीप गवस या मंगेली येथे राहत असलेल्या ७ वर्षीय चिमुकलीचा मृत्यू झाल्याची दुःखद घटना आज दुपारी १ वाजण्याच्या सुमारास घडली.
भाजी वाहतूक करणाऱ्या भरधाव टेम्पोची धडक बसल्यामुळे या चिमुकलीचा जागीच मृत्यू झाला. श्रेया संदीप गवस (रा. मांगेली) असे या चिमुकलीचे नाव आहे. श्रेया ही काल मांगेली येथून जत्रेसाठी आपल्या आईसह मामाकडे आली होती. घरी परतत असताना दुपारी ही दुःखद घटना घडली.
श्रेया हिला उपचारासाठी घटनास्थळावरून रुग्णालयात दाखल करण्यात आले, परंतु तत्पूर्वीच तिचा मृत्यू झाल्याचे वैद्यकीय अधिकाऱ्याने सांगितले. या घटनेनंतर घटना स्थळी मोठ्या प्रमाणात गर्दी जमली असून संबंधित टेम्पो चालकाला पोलिसांनी ताब्यात घ्यावे अशी मागणी जमावाकडून केली जात आहे. घटनास्थळी पोलीस दाखल झाले असून पंचनामा सुरु आहे.
