मसुरे केंद्रशाळेच्या स्नेहसंमेलनात विद्यार्थ्यांच्या कलागुणांची मुक्त उधळण!

३६ सांस्कृतिक कार्यक्रमांनी रसिकांची मने जिंकली ; वार्षिक हस्तलिखिताचे प्रकाशन व गुणवंतांचा गौरव

मालवण | प्रतिनिधी : विद्यार्थ्यांचे कलागुण आणि बुद्धिमत्ता खऱ्या अर्थाने जिल्हा परिषद शाळांमध्येच विकसित होतात, असे गौरवोद्गार जिल्हा परिषद सदस्या तथा कार्यक्रमाच्या अध्यक्ष सौ. क्षमा संदीप हडकर यांनी काढले. श्री दाजीसाहेब प्रभुगांवकर जिल्हा परिषद केंद्रशाळा, मसुरे नं. १ येथे आयोजित वार्षिक स्नेहसंमेलन व बक्षीस वितरण समारंभ उत्साहपूर्ण वातावरणात संपन्न झाला. या स्नेहसंमेलनात विद्यार्थ्यांनी सादर केलेल्या तब्बल ३६ सांस्कृतिक कार्यक्रमांतून आपल्या कलागुणांचे दर्शन घडवित उपस्थितांची मने जिंकली.
विद्यार्थ्यांच्या सुप्त कलागुणांना हक्काचे व्यासपीठ उपलब्ध करून देणाऱ्या या सोहळ्याची सुरुवात ईशस्तवनाने झाली. त्यानंतर स्वागत, प्रास्ताविक, वार्षिक हस्तलिखिताचे प्रकाशन, बक्षीस वितरण आणि मान्यवरांचा सत्कार असे विविध कार्यक्रम पार पडले. सायंकाळी ५ वाजता स्नेहसंमेलनाचे औपचारिक उद्घाटन करण्यात आले. त्यानंतर विद्यार्थ्यांच्या रंगतदार सादरीकरणांनी कार्यक्रमात रंगत आणली.

३६ सांस्कृतिक सादरीकरणांनी रंगली सायंकाळ!
गणेश वंदनेने कार्यक्रमाची दमदार सुरुवात झाली. त्यानंतर ‘शाळा मराठी’, ‘मल्हारी’, ‘Made in India’, ‘नारी शक्ती’, ‘जोगवा’, ‘लुंगी डान्स’, ‘छोगडा तारा’, ‘एकवीरा माऊली’, ‘दही दूध लोणी’, ‘आम्ही शिवकन्या’, ‘कडक लक्ष्मी’, ‘गुलाबी साडी रिमिक्स’, ‘मराठी फेस्टिव्हल डान्स’, ‘कव्वाली’, ‘जगदंबे’, ‘झुलवा पालणा’, ‘नाथाचा छबीना’ आणि ‘भजन’ अशा विविध कार्यक्रमांतून विद्यार्थ्यांनी नृत्य, संगीत आणि अभिनयाची आकर्षक मेजवानी सादर केली. ‘स्वर्गात आकाशगंगा’, ‘मळवट’, ‘वाळूच्या वाटा’, ‘South Indian Remix’, ‘कमरिया’ आणि ‘घर मोरे परदेसीया’ यांसारख्या सादरीकरणांनीही प्रेक्षकांची दाद मिळवली.

'माझी शाळा’ नृत्याने जागवली मराठी शाळेची आस्था!
या स्नेहसंमेलनातील ‘माझी शाळा’ हे सादरीकरण विशेष लक्षवेधी ठरले. मराठी शाळेचे महत्त्व, शाळेविषयीची आत्मीयता आणि शालेय जीवनातील आठवणी यांचे भावस्पर्शी दर्शन घडविणाऱ्या या नृत्याने उपस्थित पालक आणि प्रेक्षकांच्या मनाला स्पर्श केला. तसेच ‘नारी शक्ती’ आणि ‘आम्ही शिवकन्या’ यांसारख्या सादरीकरणांतून विद्यार्थ्यांनी स्त्रीशक्ती आणि आत्मविश्वासाचा संदेश दिला.

‘काळजी ते कोर्ट’ विनोदी नाटकाची विशेष रंगत
शाळेची विद्यार्थिनी कु. कृतिका कातवणकर हिने लिखित ‘काळजी ते कोर्ट’ या धम्माल विनोदी नाटकाने कार्यक्रमात विशेष रंगत आणली. विद्यार्थ्यांच्या अभिनयकौशल्यातून साकारलेल्या या नाटकाने उपस्थितांना खळखळून हसवले. विविध विषयांवरील नृत्य, अभिनय आणि सांस्कृतिक सादरीकरणांमधून विद्यार्थ्यांचा आत्मविश्वास, कल्पकता आणि कलात्मक अभिव्यक्ती ठळकपणे दिसून आली.

या कार्यक्रमाला जिल्हा परिषद सदस्या तथा कार्यक्रमाच्या अध्यक्ष सौ. क्षमा संदीप हडकर, केंद्रप्रमुख श्री. गुरुनाथ ताम्हणकर, शाळा व्यवस्थापन समितीचे अध्यक्ष श्री. सन्मेश मसुरेकर, अध्यक्षा सौ. संस्कृती बांदिवडेकर, शिक्षणप्रेमी सौ. ज्योती पेडणेकर, आर. पी. बागवे हायस्कूलच्या मुख्याध्यापिका सौ. संजना मसुरेकर, माजी सरपंच सौ. लक्ष्मी पेडणेकर, श्री. दीपक कातवणकर आदी मान्यवर उपस्थित होते.
कार्यक्रमाचे प्रास्ताविक शाळेचे मुख्याध्यापक श्री. विनोद सातार्डेकर यांनी केले. सूत्रसंचालन सौ. सुजाता सुरडकर आणि सौ. प्रगती मोरे यांनी प्रभावीपणे केले.
स्नेहसंमेलन यशस्वी करण्यासाठी मुख्याध्यापक, सर्व शिक्षकवृंद, शाळा व्यवस्थापन समिती, पालक, ग्रामस्थ तसेच विद्यार्थी मंत्रिमंडळातील मुख्यमंत्री कु. मानवी शिंगरे आणि सांस्कृतिक मंत्री कु. कोमल मोंडकर यांनी विशेष परिश्रम घेतले.
विद्यार्थ्यांच्या कलागुणांना प्रोत्साहन देतानाच शाळा, पालक आणि समाज यांच्यातील नातेसंबंध अधिक दृढ करणारे हे स्नेहसंमेलन आनंदोत्सवाच्या वातावरणात पार पडले. विद्यार्थ्यांच्या उत्स्फूर्त सहभागामुळे आणि विविधरंगी सांस्कृतिक सादरीकरणांमुळे मसुरे केंद्रशाळेचा हा सोहळा उपस्थितांच्या स्मरणात राहणारा ठरला.

▪️अमित खोत | मालवण