मालवण मच्छिमार सहकारी संस्था मर्यादित शिष्टमंडळाने वेधले प्रशासनाचे लक्ष
मालवण | प्रतिनिधी : मालवण बंदर जेटी नजीकच्या पार्किंग जागेत गेट घालून बंद करण्यात आलेले पारंपरिक मार्ग मोकळे करून मिळावेत, या मागणीसाठी 'मालवण मच्छिमार सहकारी संस्था मर्यादित' शिष्टमंडळाने बंदर निरीक्षक रजनीकांत पाटील यांची भेट घेऊन निवेदन दिले.
मालवण मच्छिमार सहकारी संस्था मर्यादित यांच्या माध्यमातून देण्यात आलेल्या निवेदनात म्हटले आहे, मालवण बंदर जेटी नजीक पार्किंग जागेत मच्छीमार सभासदांना जा ये करणेसाठी मार्ग मिळावा.
मालवण बंदर जेटी येथे वाहनांसाठी पार्किंग ची व्यवस्था केलेली आहे. सदर पार्किंग जागेमध्ये भाजी मार्केट साईडला व हॉटेल सागर किनारा येथे गेट घालून जाण्या येण्याचा मार्ग बंद केलेला आहे. या वाटेमधून पूर्वी मच्छीमार आपल्या मच्छी व इतर सामानाची ने आण हातगाडी व ट्रॉलीवर ने करीत होते. हा मार्ग बंद झाल्याने छोट्या मच्छीमारांना आर्थिक व मानसिक त्रास होत आहे. त्यासाठी आम्ही सभासदांमार्फत आपणास विनंती करतो तरी सदर जागेत चार फुटाचा मार्ग मोकळा करून मिळावा. तसेच कस्टम ऑफिस व पंचायत समिती विश्रांतीगृह या मधील रस्ता हा स्थानिक मच्छीमार सभासदांचा येण्या जाण्याचा वंशपरंपरागत रस्ता आहे. तरी सदरचा रस्ता रहदारीस पूर्ण मोकळा करून मिळावा हि विनंती. असे निवेदन देण्यात आले आहे.
यावेळी विकी चोपडेकर, सुदेश आचरेकर, दीपक तांडेल, जॉमी ब्रिटो, संतोष शिरगावकर, जॉन्सन ब्रिटन, सिद्धेश मलिये, अनमोल आढाव, सुशांत कोचरेकर, करण कुबल, कासम बांगी, मोसिन शेख, समद मुकादम, फारुख मुकादम, दरवेश आचरेकर, गौरव जोशी, अनिकेत जोशी, अजिंक्य गिरी यांसह अन्य आदी उपस्थित होते.
