डेंग्यू रुग्णांच्या पार्श्वभूमीवर मालवण शहर प्रभाग ९ मध्ये सतर्कता..

महिला-बालकल्याण सभापती अन्वेषा आचरेकर यांच्या पुढाकाराने फॉगिंग मशीनद्वारे औषध फवारणी : आरोग्य विभागाकडूनही खबरदारी व उपाययोजना

मालवण | प्रतिनिधी : मालवण शहरातील प्रभाग क्रमांक ९ मधील दांडी परिसरात डेंग्यूचे काही रुग्ण आढळून आल्याच्या पार्श्वभूमीवर तातडीने खबरदारीच्या उपाययोजना हाती घेण्यात आल्या आहेत. स्थानिक नगरसेविका तथा महिला व बालकल्याण सभापती अन्वेषा आचरेकर यांनी पुढाकार घेऊन परिसरात तात्काळ फॉगिंग मशीनच्या माध्यमातून डास प्रतीबंधक औषध फवारणी करण्यात येत आहे.
दांडी परिसरात गेल्या काही दिवसांत तापाची लक्षणे असलेले आणि डेंग्यूचे निदान झालेले काही रुग्ण सापडून आले. त्यांच्यावर उपचार सुरु आहेत. सभापती अन्वेषा आचरेकर यांनी मालवण नगरपालिकेच्या आरोग्य पथकाच्या माध्यमातून उपाययोजना हाती घेतल्या आहेत. डासांचा वाढता प्रादुर्भाव रोखण्यासाठी आणि साथीच्या आजारांचा फैलाव थांबवण्यासाठी दांडी परिसरात साचलेल्या पाण्याच्या ठिकाणी कीटकनाशक औषध आणि धूर फवारणी करण्यात आली.
यावेळी बोलताना सभापती अन्वेषा आचरेकर म्हणाल्या, "नागरिकांचे आरोग्य ही आमची पहिली प्राथमिकता आहे. डेंग्यूच्या रुग्णांची नोंद होताच प्रशासनाने व आरोग्य विभागाने तातडीने उपाययोजना सुरू केल्या आहेत. नागरिकांनीही आपल्या परिसरात स्वच्छता राखणे अत्यंत आवश्यक आहे." नागरिकांनी आपल्या घराच्या आजूबाजूला जुने टायर्स, नारळाच्या करवंट्या, तुटलेली भांडी, आजूबाजूला सोडलेले सांडपाणी किंवा कुंड्यांमध्ये पाणी साचू देऊ नये. काळजी खबरदारी घ्यावी असे आवाहन करण्यात आले आहे.

सोबतच आरोग्य विभागातर्फे प्रभागात घरोघरी जाऊन डासोत्पत्तीची ठिकाणे शोधणे आणि नागरिकांमध्ये जनजागृती करण्याचे कामही हाती घेण्यात आले आहे. कोणत्याही नागरिकाला तीव्र ताप, अंगदुखी, डोकेदुखी किंवा अंगावर लाल पुरळ यांसारखी लक्षणे दिसून आल्यास घरगुती उपचारांवर अवलंबून न राहता तात्काळ जवळील शासकीय किंवा प्राथमिक आरोग्य केंद्रात जाऊन तपासणी करून घ्यावी, असा सल्ला आरोग्य यंत्रणेकडून देण्यात आला आहे.