नगरसेवक मंदार ओरसकर यांचे तत्पर कार्य

प्रभागातील वीज खांबावर वाढलेल्या वेली झाडी हटवून वीजवाहिन्या केल्या मोकळ्या


मालवण : गणेशोत्सवाच्या पार्श्वभूमीवर मालवण शहरातील प्रभाग क्रमांक ८-ब, गवंडीवाडा परिसरातील वीज खांबांवर मोठ्या प्रमाणात वाढलेल्या वेली व झाडीमुळे वीजवाहिन्यांमध्ये अडथळे निर्माण होत होते. तसेच यामुळे वीजपुरवठ्याच्या समस्या उद्भवण्याची शक्यता होती. ही बाब लक्षात घेऊन प्रभागातील नगरसेवक मंदार ओरसकर यांच्यासह बबन वाघ व सहकाऱ्यांनी पुढाकार घेत वीज खांबांवरील वाढलेल्या वेली-झाडी काढून वीजवाहिन्या मोकळ्या केल्या.
गणेशोत्सव काळात नागरिकांची वर्दळ वाढत असल्याने तसेच घरगुती गणेशोत्सवासाठी वीजपुरवठा सुरळीत राहणे आवश्यक असल्याने हे काम करण्यात आले. वेली व झाडीमुळे वीजवाहिन्यांना अडथळा निर्माण होऊन संभाव्य वीज समस्या उद्भवू नये, यासाठी परिसरातील खांब व वाहिन्यांची स्वच्छता करण्यात आली.

या कामामुळे प्रभागातील वीजवाहिन्या मोकळ्या झाल्याने नागरिकांना दिलासा मिळाला आहे. सार्वजनिक हित लक्षात घेऊन गणेशोत्सवाच्या पार्श्वभूमीवर करण्यात आलेल्या या कामाबद्दल नागरिकांनी समाधान व्यक्त केले असून नगरसेवक मंदार ओरसकर व सहकाऱ्यांचे आभार मानले. याबाबतची माहिती बबन वाघ यांनी दिली.