सोने तारण फसवणूक प्रकरणातील संशयित स्नेहा जामसंडेकरना अटक

न्यायालयाकडून ७ सप्टेंबरपर्यंत पोलीस कोठडी; अन्य तीन संशयितांचा शोध सुरू

मालवण | प्रतिनिधी : मालवण शहर व ग्रामीण भागातील काही नागरिकांचे सोन्याचे दागिने तारण ठेवून आकर्षक परताव्याचे आमिष दाखवत तब्बल ६ कोटी ९ लाख ६१ हजार ५१५ रुपयांची फसवणूक केल्याप्रकरणी गुन्हा दाखल असलेल्या मुख्य संशयित आरोपी स्नेहा जामसंडेकर यांना पोलिसांनी अटक केली आहे. गुरुवारी त्यांना न्यायालयात हजर केले असता न्यायालयाने ७ सप्टेंबरपर्यंत पोलीस कोठडी सुनावली. दरम्यान, अन्य तीन संशयित आरोपींचा पोलिसांकडून शोध सुरू आहे.

या प्रकरणी कोळंब गावच्या सरपंच सिया रामचंद्र धुरी यांच्या तक्रारीवरून दोन दिवसांपूर्वी पोलिसांनी ‘मुथ्थुट फिनकॉर्प’च्या मालवण शाखेच्या मॅनेजर स्नेहा जामसंडेकर, कर्मचारी तन्मय पराडकर, सेन्हल आचरेकर तसेच एजंट हर्षदा आडकर या चौघांविरोधात भारतीय न्याय संहिता २०२३ मधील विविध कलमांन्वये फसवणुकीचा गुन्हा दाखल केला होता.

गुन्हा दाखल झाल्यानंतर पोलिसांनी तपासाची चक्रे वेगाने फिरवत मुख्य संशयित आरोपी तथा शाखा व्यवस्थापक स्नेहा जामसंडेकर यांना बुधवारी रात्री अटक केली. गुरुवारी त्यांना न्यायालयात हजर करण्यात आले. न्यायालयाने त्यांना ७ सप्टेंबरपर्यंत पोलीस कोठडी सुनावली आहे.

दरम्यान, या प्रकरणातील अन्य तीन संशयित आरोपींचा पोलिसांकडून शोध सुरू आहे. अप्पर पोलीस अधीक्षक नयोमी साटम यांच्या मार्गदर्शनाखाली या प्रकरणाचा पुढील तपास सुरू आहे.

सोन्याचे दागिने तारण ठेवून सुमारे 120 नागरिकांची कोट्यवधी रुपयांची फसवणूक झाल्याच्या या प्रकारामुळे मालवण शहरासह ग्रामीण भागात मोठी खळबळ उडाली असून, या प्रकरणाची सर्वत्र चर्चा सुरू आहे.