मालवण | प्रतिनिधी : देवबाग येथील एका हॉटेलमध्ये काम करणाऱ्या २० वर्षीय तरुणाने गळफास घेऊन आत्महत्या केल्याची घटना सोमवारी मध्यरात्रीच्या सुमारास घडली. चंद्रशेखर मल्लिकार्जुन राठोड (वय २०, रा. विजापूर) असे मृत तरुणाचे नाव आहे.
मिळालेल्या माहितीनुसार, चंद्रशेखर राठोड हा सुमारे तीन ते चार महिन्यांपूर्वी संबंधित हॉटेलमध्ये कामासाठी आला होता. सोमवारी मध्यरात्रीच्या सुमारास त्याने हॉटेलच्या मागील बाजूस असलेल्या फिल्टर रूमच्या बाहेर गळफास घेऊन आत्महत्या केली. हा प्रकार मंगळवारी सकाळी सुमारे १०.३० वाजता निदर्शनास आला.
घटनेची माहिती मिळताच पोलिस उपनिरीक्षक खाडे, हेड कॉन्स्टेबल जनार्दन रेवंडकर यांनी घटनास्थळी भेट देऊन पंचनामा व प्राथमिक तपास केला. या प्रकरणाचा पुढील तपास हेड कॉन्स्टेबल पेडणेकर करीत आहेत.
दरम्यान, चंद्रशेखर राठोड यांनी आत्महत्येसारखे टोकाचे पाऊल कोणत्या कारणामुळे उचलले, याचे कारण अद्याप स्पष्ट झालेले नसून पोलिस अधिक तपास करत आहेत.
देवबाग येथे हॉटेल कर्मचाऱ्याची आत्महत्या..
