फुरसे दंश; वायंगणी येथील महिलेचा मृत्यू

गावावर शोककळा


मालवण : वायंगणी नळेकरवाडी येथील सोनाली संतोष वायंगणकर (वय ५०) यांचे फुरस (सर्प) दंशामुळे दुर्दैवी निधन झाले. या घटनेमुळे वायंगणी परिसरात हळहळ व्यक्त होत आहे.

शुक्रवारी सकाळी सुमारे साडेनऊ वाजण्याच्या सुमारास सोनाली वायंगणकर या शेतात काम करत असताना त्यांना फुरस सापाने दंश केला. दंश झाल्यानंतर कुटुंबीयांनी त्यांना तातडीने प्राथमिक आरोग्य केंद्र, आचरा येथे उपचारासाठी दाखल केले. तेथील वैद्यकीय अधिकाऱ्यांनी प्राथमिक उपचार केले. प्रकृती गंभीर असल्याने पुढील उपचारासाठी ओरोस येथील जिल्हा रुग्णालयात हलविण्याचा निर्णय घेतला.
मात्र, रुग्णवाहिकेतून ओरोसकडे नेत असताना वाटेतच त्यांची प्राणज्योत मालवली. या दुर्दैवी घटनेमुळे त्यांच्या कुटुंबावर दुःखाचा डोंगर कोसळला असून परिसरात शोककळा पसरली आहे. त्यांच्या पश्चात पती, सासू, मुलगा, मुलगी असा परिवार आहे. शनिवारी सकाळी वायंगणी येथील स्मशानभूमीत त्यांच्या पार्थिवावर शोकाकुल वातावरणात अंत्यसंस्कार करण्यात आले.