मालवण | प्रतिनिधी : कोळंब मधलीवाडी येथील योगेंद्र श्रीकांत कोळंबकर (३६) या तरूणाचा मृतदेह त्यांच्या घराच्या परिसरात गळफास लावलेल्या स्थितीत शुक्रवारी दुपारी आढळून आला. याबाबत मालवण पोलीसांना माहिती देण्यात आली असून आकस्मित मृत्यू म्हणून नोंद करण्यात आली असून पुढील तपास सुरु आहे.
योगेंद्र कोळंबकर हा कोळंब परिसरात बाळा या टोपन नावाने ओळखला जात होता. तो चालक म्हणून काम करत असे. सकाळपासून बाळा हा घरामध्ये दिसून न आल्याने घरातील मंडळींनी दुपारी त्याची शोधाशोध केली असता त्याचा मृतदेह गळफास घेतलेल्या स्थितीत दिसून आला. याबाबत कुटुंबियांनी पोलीसात माहिती दिल्यानंतर पंचनामा करून मृतदेह विच्छेदनासाठी ग्रामीण रूग्णालयात हलविण्यात आला होता.
त्याच्या पश्चात आई, बहीण, भावोजी असा परिवार आहे. याप्रकरणी अधिक तपास पोलीस निरीक्षक मारूती जगताप यांच्या मार्गदर्शनाखाली हेड कॉस्टेबल जनार्दन रेवंडकर करीत आहेत.
कोळंब येथे गळफास लावलेल्या स्थितीत तरुणाचा मृतदेह सापडला
