मालवण | प्रतिनिधी : महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांच्या निर्देशानुसार सिंधुदुर्ग जिल्ह्यातील प्रत्येक तालुक्यात रघुपती राघव राजाराम सत्याग्रह' अभियानाला सुरुवात करण्यात आली आहे. अयोध्येतील श्रीराम मंदिराच्या दानपेटीतील कथित गैरव्यवहाराच्या निषेधार्थ तसेच संबंधितांना सद्बुद्धी मिळावी, या उद्देशाने हा सत्याग्रह आयोजित करण्यात आला आहे.
या अभियानाची सुरुवात गुरुवारी दोडामार्ग शहरातून करण्यात आली. दोडामार्ग येथील हनुमान मंदिरात दर्शन घेऊन गणेश मंदिर परिसरातून सत्याग्रहाला प्रारंभ झाला. यावेळी टाळ, मृदुंग आणि हार्मोनियमच्या साथीने 'रघुपती राघव राजाराम'या भजनाचे गायन करण्यात आले. तसेच रामकथावाचन, भजन आणि प्रार्थनेद्वारे श्रीराम नामाचा जयघोष करण्यात आला.
हा सत्याग्रह मंगळवार,१४ जुलै पर्यंत सिंधुदुर्ग जिल्ह्यातील सर्व तालुक्यांमध्ये राबविण्यात येणार असून विविध ठिकाणी भजन, रामकथावाचन आणि प्रार्थना कार्यक्रमांचे आयोजन करण्यात येणार आहे.
यावेळी सिंधुदुर्ग जिल्हा काँग्रेस कमिटीचे जिल्हाध्यक्ष अरविंद मोंडकर, जिल्हा उपाध्यक्ष वासुदेव नाईक, जिल्हा सचिव सुभाष दळवी, दोडामार्ग तालुकाध्यक्ष बाबू गवस, सेवादल जिल्हाध्यक्ष अजिंक्य गावडे, जेम्स फर्नांडिस, सुधीर गवस, सोनू गवस, सुधीर चांदेरकर, दीनानाथ उगवेकर, मोहन गवस, विजय हेरेकर, देवानंद हजारे, श्रीकृष्ण गवस, मदन सावंत, संदीप नाईक, तुकाराम नाईक यांच्यासह काँग्रेसचे पदाधिकारी, कार्यकर्ते आणि रामभक्त नागरिक मोठ्या संख्येने उपस्थित होते.
दोडामार्गातून काँग्रेसच्या 'रघुपती राघव राजाराम सत्याग्रह'ची सुरुवात
