घराचे पत्रे उडालेल्या तारकर्ली येथील कुटुंबाला मनसे तालुकाध्यक्ष गॅरी अन्ननसिएशन यांच्याकडून मदतीचा हात

तातडीने १५ सिमेंट पत्रे, ताडपत्रीची मदत

मालवण | प्रतिनिधी : पाऊस व जोरदार वाऱ्यात तारकर्ली येथील रहिवासी श्रीमती वैशाली मुंबरकर यांच्या राहत्या घराचे छताचे पत्रे उडून गेल्याची घटना नुकतीच घडली. ऐन पावसाळ्यात मोठे संकट कोसळले.

वैशाली मुंबरकर यांच्या घराचे पत्रे उडाल्याची बाब स्थानिकांमार्फत देवबाग ग्रामपंचायत सदस्य पास्कोल रॉड्रीग्ज यांना समजली. परिस्थितीचे गांभीर्य ओळखून पास्कोल रॉड्रीग्ज यांनी लगेचच आपले सहकारी मित्र आणि मनसे तालुकाध्यक्ष गॅरी अन्ननसिएशन यांच्याशी संपर्क साधला व त्यांना मदतीसाठी आवाहन केले.

मनसे तालुकाध्यक्ष गॅरी अन्ननसिएशन यांनी सामाजिक बांधीलकितून मुंबरकर यांच्या निवासस्थानी धाव घेतली. नुकसानीची पाहणी केली. निवारा उभारण्यासाठी १५ नवीन सिमेंट पत्रे आणि एक मोठी ताडपत्री स्वखर्चातून सुपूर्द केली. यामुळे मुंबरकर कुटुंबाच्या घराला आधार मिळण्यासाठीमदत झाली आहे.

संकटसमयी मदतकार्य हेच आपले आद्य कर्तव्य आहे. मुंबरकर कुटुंबाला या संकट काळात छोटीशी मदत करता आली याचे समाधान आहे असे गॅरी अन्ननसिएशन यांनी सांगितले.

ऐन गरजेच्या वेळी धावून जात दाखवलेल्या या उदात्त आणि सामाजिक वृत्तीबद्दल गॅरी अन्ननसिएशन आणि त्यांना तात्काळ संपर्क करणारे पास्कोल रॉड्रीग्ज यांचे तारकर्ली ग्रामस्थांकडून विशेष आभार मानले जात आहेत.