नारळी पौर्णिमा मिरवणुकी दरम्यान वादंग
कुडाळ : नारळी पौर्णिमेनिमित्त काढलेल्या मिरवणुकीत भाजप आणि ठाकरे गट दोन्ही पक्षाचे कार्यकर्ते आमनेसामने आले आणि वादंग निर्मण झाला. त्यामुळे काही काळ कुडाळ शहरात वातावरण तणावपूर्व बनले होते.
अखेर पोलिसांनी हस्तक्षेप केल्यावर दोन्ही मिरवणुका मार्गस्थ झाल्या असल्या तरी पुन्हा एकदा काळप नाक्यावर तणावपूर्ण परिस्थिती निर्माण झाली होती.
नारळीपौर्णिमेनिमित्त आज संध्याकाळी कुडाळ शहरात भाजप आणि उद्धव ठाकरे शिवसेनेकडून वेगवेगळ्या रॅलींचे आयोजन करण्यात आले होते. पोलिसांनी दिलेल्या माहितीनुसार भाजपच्या रॅलीला तीन वाजतानाचा वेळ दिला होता तर ठाकरेगटाच्या रिक्षा रॅलीला दोन तासांची वेळ देण्यात आली होती. पण दोन्ही रॅली साधारण एकाच वेळी सुरु झाल्या. ठाकरे शिवसेना कार्यालयाकडे दोन्ही पक्षांच्या रॅली येताच वाहतुकीची कोंडी झाली. यादरम्यान, भाजप कार्यकर्त्यांनी फटाके लावून जल्लोष केला. याचवेळी भाजप आणि ठाकरे शिवसेना कार्यकर्त्यांमध्ये जोरदार बाचाबाची झाली. यावेळी दोन्ही पक्षांच्या कार्यकर्त्यांनी जोरदार घोषणाबाजीही केली. दोन्ही बाजूचे कार्यकर्ते एकमेकांच्या अंगावर जाण्याचा प्रयत्न झाला. या दरम्यान कोणतीही अनुचित घटना घडू नये म्हणून कुडाळ पोलिसांचा कडक बंदोबस्त ठेवण्यात आला होता. पोलिसांनी वेळीच धाव घेऊन दोन्ही बाजूच्या कार्यकर्त्यांना आवरले.
