सिंधूरत्न समृद्ध योजनेअंतर्गत मिळणार लाभ
सिंधुदुर्ग | प्रतिनिधी : सिंधुदुर्ग जिल्ह्यातील मूर्तिकारांना प्रोत्साहन देण्यासाठी शासनाने एक नवीन योजना आणली आहे. सिंधूरत्न समृद्धी योजने अंतर्गत यावर्षी मूर्तिकारांना मूर्तिकाम व्यवसाय करिता ७५% अनुदान अथवा कमाल ५० हजार रुपये इतके अनुदान देणार येणार आहे. सिंधुदुर्ग जिल्हा परिषदेच्या ग्रामपंचायत विभागाने जिल्ह्यातील सर्व पंचायत समितींना लाभार्थ्यांची यादी दिनांक १० ऑगस्ट २०२४ पर्यंत बनवून ती १२ ऑगस्ट २०२४ पर्यंत संबंधित जिल्हा परिषद कार्यालयात जमा करण्याचे आदेश दिले आहेत.
गेल्या अनेक दिवसांपासून मूर्तिकारंकडून मूर्तिकाम व्यवसायासाठी अनुदान जाहीर करण्याची मागणी केली जात होती. शाडू माती, रंग आणि मजुरीचे वाढलेले दर यामुळे मूर्तिकारांना त्रास सहन करावा लागत आहे. या सगळ्यातूनच मूर्तीकारांना दिलासा देण्यासाठी शासनाकडून या योजनेचे अंमलबजावणी करण्यात आली आहे.
या योजनेचा लाभ मिळवण्यासाठी मूर्तिकारांनी दिनांक 10 ऑगस्ट पर्यंत अर्ज भरून जिल्हा परिषद कार्यालयामध्ये जमा करायचे आहेत. या अर्जात नाव, पत्ता, मोबाईल क्रमांक ही माहिती भरून ग्रामपंचायतीचा ना हरकत दाखला, गणेश मूर्तिकार व्यवसाय करत असल्याचे ग्रामपंचायतीचे प्रमाणपत्र, ज्या जागेत व्यवसाय करत आहे त्या जागेचा घर पत्रक उतारा, गणेश मूर्ती बनवत असल्याचा फोटो, आधार कार्ड, पॅन कार्ड आणि बँक पासबुकची प्रत ही कागदपत्रे जोडणे गरजेचे आहे.
