जुबेर खान | मालवण : छत्रपती शिवाजी महाराजांच्या पदस्पर्शाने पावन झालेल्या मालवण तालुक्यातील ऐतिहासिक कांदळगाव श्री देव रामेश्वर मंदिर येथे आज, रविवार २६ ऑक्टोबर २०२५ पासून (पांडव पंचमीच्या शुभमुहूर्तावर) सात दिवसीय अखंड हरिनाम सप्ताहाचे सुरुवात झाली आहे.
या अखंड हरिनाम सप्ताहाची सांगता रविवार ०२ नोव्हेंबर २०२५ रोजी होणार आहे. विशेष म्हणजे, हा दिवस प्रबोधिनी भागवत एकादशी, चातुर्मास समाप्ती आणि तुलसी विवाह या तीन महत्त्वपूर्ण धार्मिक योगांमुळे अधिक पवित्र ठरला आहे. याच दिवशी भगवान विष्णू चार महिन्यांच्या योगनिद्रेतून जागृत होतात आणि सर्व शुभ-मांगलिक कार्यांना सुरुवात होते.
मालवणसारख्या ऐतिहासिक भूमीतील कांदळगावच्या या पारंपरिक सोहळ्यात सहभागी होऊन भाविकांनी आपले जीवन कृतार्थ करावे. हरिनाम सप्ताहादरम्यान रामेश्वर मंदिर परिसरात भक्तिमय वातावरणात भाविकांना आध्यात्मिक अनुभूती मिळेल.
गावाचे राणे परब मानकरी गावघर आणि समस्त कांदळगाव ग्रामस्थांनी एकत्रितपणे केलेला हा अखंड हरिनाम सप्ताह, कांदळगाव पंचक्रोशीतील रीतिरिवाज आणि पारंपरिक सांस्कृतिक एकतेचे प्रतीक आहे.
