मूर्तिकार रंग कामात व्यस्त : पाच दिवसांनी येणार बाप्पा भक्ता घरी
संजय माने | पोईप :
कोकणातील सर्वात मोठा गणेशोत्सव अवघ्या पाच दिवसांवर येऊन ठेपल्याने गणेश मूर्तीकाराची लगबग वाढली आहे. रात्र रात्र जागून गणेशमूर्ती रंगविण्यात मुर्तीकार व्यस्त असल्याचे दिसून येत आहे. त्यातच गेल्या चार पाच दिवसांपासून असलेल्या पावसाच्या संततधारांमुळे मुर्ती वाळविण्याच्या कामात व्यत्यय येत आहे. श्रावण महिना सुरू होताच कोकणवासीयांना गणेशोत्सवाचे वेध लागतात. आधुनिकतेची झालर असून ही कोकणात गावागावांमध्ये आजही पारंपरिक गणेश चित्रशाळां मधूनच गणेश मूर्त्या नेल्या जातात. तसेच मुंबई, गोवा, पुणेकर,चाकरमानी हा सण मोठ्या उत्साहात साजरा करण्यासाठी खास आपल्या मुळगावी घरी कोकणात येतात.
जिल्हात गणपती पूजन करण्यात येत असल्याने शाडू मातीच्या गणेश मुर्तींना मोठी मागणी असते.गणेश चतुर्थी अवघ्या पाच दिवसांवर येवून ठेपल्याने मुर्ती रंगवण्यासाठी मुर्तीकारांची सध्या धावपळ सुरू आहे. पावसामुळे विजेचा लपंडाव सुरू असल्याने अडथळे येत आहेत. त्यामुळे मूर्तीकारांना जनरेटरचा आधार घ्यावा लागत आहे.
